Newid eich gyrfa, newid bywydau

Y Rôl

Mae Dirprwy Gyfarwyddwr TAR (Cymru) yn darparu arweinyddiaeth academaidd a gweithredol uwch ar gyfer y rhaglen TAR, gan weithio mewn partneriaeth agos â Chyfarwyddwr y rhaglen TAR. Mae'r rôl yn arddel cyfrifoldeb dirprwyedig am arweinyddiaeth strategol, cynllunio'r cwricwlwm, ansawdd academaidd, trefniadau partneriaeth, a chydymffurfiaeth reoliadol ar draws rhaglen Addysg Gychwynnol i Athrawon gymhleth, ddwyieithog ac aml-bartner.

Mae hon yn swydd arweinyddiaeth academaidd uwch sy'n cyfateb i lefel Uwch-ddarlithydd (Addysgu ac Ysgolheictod) ar lefel AC4, gan gyfuno arweinyddiaeth y rhaglen ag addysgu, ymchwil ac ysgolheictod, arloesedd cwricwlaidd, ac ymgysylltu academaidd allanol. Mae deiliad y swydd yn sicrhau cydlyniant, ansawdd a gwelliant parhaus wrth ddarparu'r rhaglen, yn unol â'r Cwricwlwm i Gymru, gofynion SAC, trefniadau llywodraethu academaidd Y Brifysgol Agored, ynghyd â rheoleiddwyr allanol, gan gynnwys Cyngor y Gweithlu Addysg ac Estyn. 

Mae'r Dirprwy Gyfarwyddwr yn cyfrannu at ddatblygiad strategol Addysg Gychwynnol i Athrawon yn Y Brifysgol Agored yng Nghymru ac yn chwarae rhan weithredol mewn trafodaethau cenedlaethol ac ar draws y sector ynghylch addysg athrawon, polisi a datblygu'r gweithlu.  

Mae'r TAR yn Y Brifysgol Agored yng Nghymru yn cynnig llwybr hyblyg i'r proffesiwn addysgu, sydd o bwys cenedlaethol. Mae'n cyfuno dysgu ar-lein, addysgu byw a lleoliadau mewn ysgolion, gan arwain at Statws Athro Cymwysedig (SAC). Caiff y rhaglen ei darparu ar draws pob awdurdod lleol yng Nghymru drwy bartneriaeth helaeth o ysgolion, mentoriaid a staff prifysgolion, mae ar gael yn Gymraeg ac yn Saesneg, ac mae'n chwarae rhan ganolog wrth ehangu mynediad i'r proffesiwn, cryfhau amrywiaeth y gweithlu, a chefnogi blaenoriaethau cenedlaethol, gan gynnwys addysg cyfrwng Cymraeg a recriwtio ar gyfer pynciau lle mae prinder.

Cyfrifoldebau Allweddol

• Darparu arweinyddiaeth academaidd, goruchwylio'r cwricwlwm, ymgysylltu â phartneriaethau, cymorth o ran cydymffurfiaeth reoliadol, ac addysgu.
• Darparu arweinyddiaeth academaidd uwch ar draws y rhaglen TAR, gan gefnogi'r Cyfarwyddwr o ran datblygiad strategol, goruchwylio'r ddarpariaeth, a gwelliant parhaus.  
• Cymryd rhan flaenllaw yn y gwaith o gynllunio, datblygu, adolygu a gwella modiwlau a'r cwricwlwm ar lefel y rhaglen, gan gynnwys darpariaeth newydd lle bo angen. 
• Arwain y ddarpariaeth weithredol ym mhob rhan o dîm y cwricwlwm, gan sicrhau gweithredu cyson o ansawdd uchel ar draws holl lwybrau'r rhaglen.
• Datblygu a chymhwyso dulliau arloesol, sy'n seiliedig ar dystiolaeth, ar gyfer addysgu, dysgu ac asesu o fewn model AGA dysgu cyfunol a dysgu o bell. 
• Sicrhau bod y gwaith o gynllunio a chyflawni'r cwricwlwm yn cyd-fynd â'r Cwricwlwm i Gymru, gofynion SAC, a safonau llywodraethu academaidd Y Brifysgol Agored. 
• Goruchwylio'r gwaith o gynllunio asesiadau, prosesau cymedroli, safoni a sicrhau ansawdd er mwyn sicrhau tegwch, cysondeb ac uniondeb academaidd. 
• Arwain a chefnogi'r Tiwtoriaid Cwricwlwm, gan gynnwys dyrannu llwyth gwaith, rheoli perfformiad a datblygiad proffesiynol.
• Darparu trefniadau goruchwylio uwch ar gyfer partneriaethau ysgolion ledled Cymru, gan sicrhau cysondeb, ansawdd a thegwch o ran profiadau dysgu ar leoliad.
• Arwain y gwaith o ddatblygu, hyfforddi a sicrhau ansawdd mentoriaid a thiwtoriaid ymarfer ym mhob rhan o system y bartneriaeth. 
• Sicrhau cydymffurfiaeth gadarn â fframweithiau rheoliadol, gan gynnwys gofynion Cyngor y Gweithlu Addysg, disgwyliadau Estyn, a pholisi AGA Llywodraeth Cymru.
• Cyfrannu at y gwaith o gynllunio busnes, dyrannu adnoddau, a sicrhau cynaliadwyedd ariannol y rhaglen. 
• Arwain prosesau gwella parhaus a gwella ansawdd, gan gynnwys monitro systematig, gwerthuso a chynllunio camau gweithredu.
• Goruchwylio profiad academaidd myfyrwyr, gan sicrhau tegwch, cysondeb ac uniondeb wrth wneud penderfyniadau ynghylch asesu a chynnydd.
• Cyfrannu at ehangu cyfranogiad, cynhwysiant, a chanlyniadau gwell ar draws carfannau amrywiol o fyfyrwyr.
• Ymgymryd â gwaith cynllunio gweithredol effeithiol ar draws blaenoriaethau croes mewn amgylchedd rhaglen gymhleth a gwasgaredig. 

Amdanoch Chi

Meini prawf hanfodol:

• Gradd anrhydedd a chymhwyster ôl-raddedig mewn addysg neu faes cysylltiedig (lefel Meistr o leiaf;  PhD yn ddymunol). Bydd rhaid i ymgeiswyr ar lefel gradd Meistr ddangos ymrwymiad i ymgymryd â Doethuriaeth mewn Addysg (EdD) yn Y Brifysgol Agored.
• Statws Athro Cymwysedig (SAC).
• Gwybodaeth fanwl ac arbenigedd cydnabyddedig mewn Addysg Gychwynnol i Athrawon a system addysg Cymru, gan gynnwys y Cwricwlwm i Gymru a'r cyd-destun polisi cyfredol. 
• Profiad sylweddol o arweinyddiaeth ym maes Addysg Gychwynnol i Athrawon, datblygu athrawon, neu faes cysylltiedig agos. 
• Gallu amlwg i gynllunio, cyflwyno ac adolygu'r cwricwlwm neu fodiwlau mewn cyd-destunau addysg uwch neu addysg broffesiynol.
• Profiad o ddefnyddio technolegau digidol i wella prosesau addysgu, dysgu, asesu a chyflwyno rhaglenni.
• Tystiolaeth o ymgysylltu ag ymchwil addysgol, ymholiadau ymarferwyr, neu weithgarwch ysgolheigaidd sy'n berthnasol i addysg athrawon. 
• Sgiliau cyfathrebu a dylanwadu cryf, ynghyd â'r gallu i rannu syniadau academaidd, addysgegol a rheoliadol cymhleth â chynulleidfaoedd amrywiol.
• Y gallu i gyflawni'r rôl mewn modd sy'n gyson â deddfwriaeth cydraddoldeb a pholisïau'r Brifysgol.
• Y gallu a'r parodrwydd i deithio ledled Cymru ac i weithio'n rheolaidd o swyddfa Caerdydd, gan dreulio mwy na 50% o'r amser dan y contract yng Nghymru. 

Meini prawf dymunol:

• Yn rhugl yn y Gymraeg (ar lafar ac yn ysgrifenedig) neu brofiad o weithio mewn amgylchedd dwyieithog. 
• Profiad o weithio gyda fframweithiau arolygu, achredu neu reoleiddio (e.e. Estyn, CGA neu gyrff tebyg).
• Profiad o weithio ym maes addysg gychwynnol i athrawon, rhaglenni proffesiynol neu ddarpariaeth sy'n seiliedig ar bartneriaethau.
• Profiad o gyfrannu at neu arwain ymchwil addysgol, cyhoeddiadau neu gyflwyniadau mewn cynadleddau. 
• Profiad o arwain neu gyfrannu at weithgarwch gwella prosesau neu newid sefydliadol.
• Cymhwyster neu gydnabyddiaeth addysgu Addysg Uwch (e.e. Cymrodoriaeth Advance HE neu gyfwerth).

Cymorth gyda'ch cais

Beth yw'r buddion i chi?

Trefniadau Gweithio Hyblyg

Camau nesaf yn y broses Recriwtio

Mae dyddiadau cyfweliadau i'w cadarnhau.

Hysbysiad dyddiad cau cynnar

Er y bydd y rhan fwyaf o'r rolau yn parhau ar agor tan y dyddiad cau a hysbysebir, gall ceisiadau gael eu hadolygu yn barhaus. Mewn rhai achosion, gall swyddi gwag gau yn gynharach pe bai nifer digonol o geisiadau addas wedi dod i law ac mae'r effeithiau ar gydraddoldeb wedi cael eu hystyried yn briodol. Bydd yr holl rolau yn parhau i gael eu hysbysebu am o leiaf un wythnos cyn iddynt gael eu cau yn gynnar.

Os ydych wedi dechrau cais neu yn y broses o wneud cais pan gaeodd yr hysbyseb, rydym yn eich annog i gysylltu â ni. Rydym yn ymrwymedig i ddeall amgylchiadau unigol ac yn gallu cynnig cymorth ychwanegol lle y bo angen, gan gynnwys addasiadau rhesymol ar gyfer ymgeiswyr sydd â nodweddion gwarchodedig.

Sut i wneud cais

I wneud cais am y rôl hon, dylech gyflwyno'r ddogfen/dogfennau canlynol:

• CV
• Datganiad Ategol hyd at 1,000 o eiriau. Yn eich datganiad, dylech egluro pam mae gennych ddiddordeb yn y rôl, gan nodi enghreifftiau lle mae eich sgiliau a'ch profiadau yn cyfateb i feini prawf hanfodol y rôl hon fel y nodir uchod. 

Gallwch weld hynt eich cais a gohebiaeth yn ymwneud ag ef pan fyddwch wedi mewngofnodi i'n system recriwtio.  Edrychwch yn eich ffolderi sbam/sothach os na fyddwch wedi cael diweddariadau cysylltiedig drwy e-bost.